BANI horja adat malasni uhur pakon pusokni uhur bani halak Simalungun. Si Tatangagtur Horja maningon gomos mampartahankon nilai-nilai budaya Simalungun.
Aima buahni parbualan na isepakati limapuluh Si Tatangatur Horja Adat Simalungun, tikki mandihuti horja marbualbuali naiadonghon DPC-PMS) Kota Pamatangsiattar, Sabtu (16/9) i aula Fakultas Hukum USI.
Parbualan natamas tumang, tikki massahapi pengaruh budaya simbalok nadomma gati taridah bani pesta adat Simalungun.
Nini Januarison Saragih Sumbayak SH MHum, pengaruh budaya nalegan bani budaya Simalungun maningon ipasoh. Halani ai boi pamagouhon budaya Simalungun hu lobeini arion.
“Maningon pakkardo hita manappang, ase ulang masuk budaya nalegan bani horja adat Simalungun. Minimal, tikki hita simada horja atappe suhut,” torang Januarison.
Bani marbualbuali pasal Horja Adat Pusokni Uhur naiboanhon, Ketua DPC PMS Kabupaten Simalungun St Lensudin Saragih Sumbayak, makkatahon, bani pesta adat Pusokni Uhur adong piga piga istilah nadomma ipakei aima, Matei Matua, Matei Sayurmatua pakon Matei Layur Matua.
Iatahon Matei Matua, anggo adongpe niombahni namarujung goluh lapa marrumah tangga atape marhajabuan.
Matei Sayurmatua aima, haganupan niombahni namarujung goluh domma marumah tangga janah domma dong pahoppuni. Tapi sipata, gabe parbualan do on itongah-tongahni halak simalungun. Halani, adongdo huma namarujung goluh domma toras atap matua tumah. Tapi adong ope niombahni lape marumah tangga padahal domma patut marumah tangga.
Bani sapahara ai, iputushon haganupan namarhadomuan bani sisongon ai, iriahhon ma ai bani riah huta.
Horja adat Layurmatua aima, haganupan niombahni namarujung goluh domma marumah tangga, janah domma dong nini pakon nono ni. Tapi lape dong ginopparni namarujung goluh parlobei. Janah bani haganupan horja adat ai, maningon iriahhon bani riah huta.
Bani horja adat Simalungun ipukkah haganupan mamrhitei riah huta.
Janah pitah riah huta do dong bani halak Simalungun. Anggo dong istilah nalegan, lang bagianni halak simalungun ai.
“Bani halak Simalungun riah huta do mamukkah haganupan horja. Langdong nalegan,” nini Lensudin.
Lensudin patoranghon, riah huta aima horja manriahhkon pardalanni horja adat nalaho ihorjaon. Tikki riah huta, maningin sirsirdo haganupan perangkat aima, suhut, tondong, sanina, boru, anak boru sanina, anak boru jabu, ditambah namatuani huta.
Napaling tamas ibualhon bani sesi parlobei, aima bani horja adat pusokni uhur tikki mamukkah horja, dong manatti gondrang. Nuan on, domma bahat taridah halak naparlobei manatti gonrang aima pengurus gereja atappe pendeta. Nasittongni, ai lang boi, halani bani manatti gondrang ai parbagianni pahoppu do ai.
Bani parbualan sesi paduahon, Sekretaris Jendral DPP Presidium PMS, Djapaten Purba mamboanhon parsahapan pasal pesta malasni uhur marhajabuan.
Djapaten patoranghon, bani horja adat marhajabuan domma gati marsampur adat. Apalagi namarhajabuan ai, marlain suku.
Tapi, bani halak Simalungun anggo pas simamda hoja (suhut) maningonma ipertahankon adat budaya Simalungun. Janah, ijonma porlu Si Tatangatur Horja pajoreihon haganupan nalang tipak bani mandalanhon horja ai.
Bani panorang ai, Sekretaris DPC PMS Kota Pamatangsiattar, Rohdian Purba SPd SSI patugahkon, horja aima bahagian program nadomma isusun DPC PMS Kota Pamatangsiattar. Janah nanamdihuti horja, aima halak nadomma langsung tarlibat makhorjahon horja adat itongah tongah ni masyarakat.
Ketua DPC PMS Kota Pamatangsiattar DR HC Minten Saragih Sumbayak, patoranghon use, haganupan naibualhon bani horja ai, aima martujuan nalaho mampartahankon jatidiri budaya Simalungun i Kota Siattar.
Horja itutup, marhitei mambere sertifikat pakon pin PMS hubani Si Tatangataur Horja Adat, na ipadas Sekjen DPP Presidum PMS Djapaten Purba pakon Ketua DPC PMS Kota Pamatangansiattar DR HC Minten Saragih Sumbayak. (*)
Iterjemahkon humbani Harian MetroSiantar
Komentar
Posting Komentar